ليه حل الدولتين فشل؟

من 30 سنة حركة فتح ومنظمة التحرير الفلسطينية،وافقوا على “حل الدولتين” أو “اتفاقية أوسلو” مع إسرائيل.

يعني يعملوا جنب الإحتلال، حكم ذاتي على الأراضي التي محتلها إسرائيل من 67، اللي بتشمل الضفة الغربية وقطاع غزة، وتبقى القدس الشرقية بس، عاصمة فلسطين.

من الأخر اتفاقية أسلو يعني تجريم المقاومة، وننسى تماما تحرير فلسطين كلها من النهر للبحر.

بعد 30 سنة من أوسلو، والتوسع الاستيطاني الإسرائيلي في الضفة الغربية والقدس بيزيد بتوحش.

30 سنة ولسه بنشوف ممارسات إسرائيلية يومية، تَضمن الفصل العنصري والتهجير القسري والتطهير العرقي والإبادة الجماعية لكل الشعب الفلسطيني.

الاحتلال بيبني معسكرات لجيشة تحمي المستوطنين وهما بيقتلوا الفلسطينيين.

وبني جدار فصل عنصري، وكل يوم بتكبر شبكة المستوطنات والطرق، اللي بتحاصر المدن الفلسطينية، لغاية ما بقوا 282 مستوطنة في الضفة بس.

ومع مشروع صفقة القرن، أمريكا اعترفت بسيادة إسرائيل على القدس كلها كعاصمة أبدية للاحتلال، وبكل المستوطنات ولا أكن في اتفاقية أوسلو أصلا.

والفلسطينيين هنشوفلهم شِبه دولة منزوعة السلاح عاصمتها أبو ديس شرق القدس، لا وكمان لازم يعترفوا الأول بباقي القدس عاصمة لإسرائيل، ويتنازلوا عن حق عودة ملايين الفلسطينيين، وطبعا يبيعوا المقاومة، ويسلموا سلاحها، ونقفل على القضية خلاص.

حل الدولتين يعني، 3.7 مليون فلسطيني عايشين فوق بعض في مخيمات في لبنان والأردن وسوريا، هيعيشوا طول حياتهم لاجئين، هما وملايين من الفلسطينيين في باقي العالم.

اتفاقية أوسلو حولت حركة فتح، من حركة ثورية هدفها تحرير فلسطين بالمقاومة المسلحة، لسلطة ديكتاتورية بتقمع شعبها، عشان مش قادره تحميهمم.

مش قادرة تحميهم، لا من هجمات المستوطنين ولا من جيش الأحتلال اللي خلا ل ٣٢ يوم من الإبادة الحالية لغزة، بادروا بقتل أكثر من 163 فلسطيني في الضفة،
ده غير سرقة الأراضي.

حل الدولتين يعني الإحتلال يكمل تحت عين السلطة الفلسطينية، ضد الشعب.

المقاومة المسلحة هي الشرعية الوحيدة للشعب الفلسطيني، لحد ما تتحرر فلسطين من النهر للبحر، و مفيش بديل غير إنهاء نظام الفصل العنصري، وإقامة دولة فلسطينية واحدة للجميع.