بوابة الاشتراكي

إعلام من أجل الثورة

قصيدة الخاين

انت خاين
انت خاين ياللي بتكتب شعر
أو رواية أو مقالة
أو رسالة
والكلمة حسب الاتفاق والسعر
شكر ومديح للنجمة أو للنسر
دول خلصونا من الحثالة
بعد ما هتفنا الهتاف
عيش وحرية وعدالة
الحمد ليهم والريالة على اللي يتحدث باسم القصر
طب افتكر تاني الهتاف
الأم قتلت ابنها لما طلب
عيش بس حاف
والحبس فيه منا الآلاف
لو ابن عمك ليه زميل في الشغل
صاحب ابنه في الائتلاف
يبقى اعدام ليك وليه من غير خلاف
شايل بطاقته فجيبك
خايف مالكماين
دبوسه عالشنطة معلقه وباين
وبتشتري دماغك حقك عليك هاين
يبقى مين فينا اللي خاين؟
انت اللي خاين
انت اللي خاين لو نزلت أيام يناير
ضد ظلم وحكم جائر
في الصفوف الأولى ثاير
بالصلح كافر
بالنصر ظافر
ضد الفحول
ويّا الحيتان ويّا الغيلان ويّا الفلول
جي دلوقتي تقول
عاوز أسافر
عاوز أهاجر
الثورة أصعب مما كنت فاكر
ياخي غور
وأنسى إنّك يوم طالبت
بحد أدنى للأجور
وأنسى اللي عايشين في القبور
واما ترجع حتلاقيني برضه ثاير
انا ليا تار عند أصحاب القصور
الورد فتح في الصخور مش في الجناين
انت اللي خاين
واللي فوض واللي بايع
برضه خاين
واللي مع أو مش ممانع
برضه خاين
واللي عامل نفسه مش شايف وسامع
واللي قاصد يبقى مش شايف وسامع
واللي طبل في الجوامع
واللي سقف في الكنايس
والمسيس واللي بيحاول يسايس
واللي مالي قلوبنا بالخوف والهواجس
واللي خلاني أخون…
حبيبتي، لما تبصلي وتسأل حتحميني؟
جوابي سكون
انا أصلي مش موسى بس العدو فرعون
والثورة محبوسة والدم ملهوش لون
والفجر جوه الضلمة مش شايف
معاد قومه
وأنا خايف
لكن بضحك
منا عارف
إن خوفي وضحكي فاضْحك
وإن صَرحك مع مصالحك
حبل حوالين الرقاب لافف
مهما تدخل ميت تحالف أو تخون
بكرة تلقى شهيد يحاسبك ورب كاشف
كلمته هي القانون
والقواضي حيقفوا جنبك
والقساوسة والدقون
ده كل منكو ليه يومه عليكو ديون
يا كُلّ المطحونين قوموا
كفاية سكون
يا كُل الساكتين سيبوا حياة الدون
يا كُل الثائرين ثوروا على المأفون
الثورة مش محبوسة..
غير للي ليها يخون