بوابة الاشتراكي

إعلام من أجل الثورة

قصيدة: إحنا البشر فوق الورق

إحنا العرق
إحنا البشر فوق الورق
لكننا في الحياة أرقام
سجنك رقم، دورك رقم
موتك رقم، عمرك رقم
إحنا العرق وإحنا الورق
المكتوبين بالقلم
والمضروبين بالقلم
والمرسومين بالدم
فوق صاري العلم
والمجلودين جلدة بـ وجع
جلدة بـ مرض
جلدة جهالة وجلد برد بإيد مطر
وبإيد ليالي زي الجليد وقلوب حجر
محسوبة على جموع البشر
مكتوب على كفوفهم خطر
مكتوب على جيوبهم سلاح
الرأسمالية اللي غذائها موت
وكاتمة العالم من أعلى صوت
ولا صوت يومنا سوف يعلوا
عـ الدولار والجنيه
بالظبط زي العامل في المصانع متداس عليه
وآدي الطيور مدفونة
في سجن مـ العتمة
والعتمة نور باسم الأمل
والعالم مكتوم بصدمة
والصدمة عنوان العمل
ملعون يا ليل المسجونين
ملعون يا قطر الغلبانين
اللي اتحرق بكل ما فيه من كفوف
مشقوقة بـ كفاح العرق
مكتوبة عنوان عـ الورق
“الغلطة غلطة عامل تحويلات”
برضوا راميين الغلط عـ الفقر
كل الأنظمة اللوامة بـ اسم العهر
رامية أخطاء الطغاة
على كل من تحت خط القهر
على كل من هم تحت أنقاض الحروب
باسم أضغاث النفوس
باسم أنقاض الدولار
ملعونة يا دول السولار
محروقة يا جبال الفلوس.