بوابة الاشتراكي

إعلام من أجل الثورة

قصيدة: مدد يا طالب

مدد يا طالب مدد
القوة مش بالكترة أو بالعدد
الصوت بيفتح قبور
زي ما بيهدم قصور
والقصر أضعف من هتاف المظلومين
طالب ودب برجله فوق الأرض مزًعها
يهتف في وسط البور
فتطب تحته الأرض مخصوبة يزرعها
من قلب جمر القلب يطلق الهتافات
وبحركة منه في الحشود يوزعها
والحق مسلوب والحلم مش هاين
ولا يتفرض مكتوب ولا يؤتمن خاين

والطلبة تحيا وتكتب السيرة
بهتاف مسيرة عسيرة
متغطية بخرطوش وبغازها وخميرة
وكل إللِّي كان مفروض صبح مرفوض
وتعود يا صوت الحق للطلاب
والسيرة للجدعان
وبتنحكي على دق عزف العود:
“رجعوا التلامذة ورد الجناين”
ولا يتفرض مكتوب ولا يؤتمن خاين

الأرض ولًادة للثورة والجدعان
والسكة للأحرار والحبس للسجّان
والامتحان ورقة وقلم وهتاف
واللبس متغطي بالدم والدخان
مقتول النهار قبل الفطار
والدم طرطش ع الرغيف الحاف.

مدد يا طالب ألف مدد
يا صخر من صلب الميدان إتولَد
وللميدان هيعود
والدولة عبرة للتاريخ أُسطُر
كل نظام فاشي راح ينتهي مَوءود