هتافات الثورة والحرية

آدي مفهومهم للتغيير.. سجن صغير يبقى كبير.. وآدي مفهومهم للعدالة.. الإضراب قدّامه دبّابة.. آدي مفهومهم للحرية.. تدعيم الدولة الأمنية.

عمر السجن ما غير فكرة.. عمر القهر ما أخر بكرة.. اعتقال اعتقال.. والنضال هو النضال.. لو خطفونا من الشوارع.. صوتنا الحر طالع طالع.. لو خطفونا من البيوت.. صوت الثورة مش هايموت.

اكتب على حيطة الزنزانة.. حبس الثوار عار وخيانة.. هاتوا رفاقنا المعتقلين.. هاتوا اخواتنا من الزنازين.. هيثم هيثم يا أخانا.. كيف العتمة ف الزنزانة؟ كيف السجن والسجانة؟ هيثم هيثم يا رفيق.. الحرية على الطريق.

علّي وعلّي وعلّي الصوت.. مافيش فايدة من السكوت.. علي صوتك بالهتاف.. عمر الثورة ما هاتخاف.. ال بيحبس في الثوار.. بينا بينه دم وتار.. واللي بيحبس في العمال.. بكرة يحصل ال اتشال.

الحرب على الإرهاب.. مشيها على الإضراب.. ولأجل المليارات.. نزلنا الدبابات.. ورجل أعمال نسيبنا.. وده حرامي قريبنا.. ونعلن في الإذاعة.. ثورتكم دي إشاعة.. وعملنا ثورة جديدة.. إنسى الثورة القديمة.. وعكاشة يبقى قائدها.. والسيسي هو حبيبها.. ولميس ويا إبراهيم.. بيكملوا التلحين والشرطة في الميادين.. والكدب في الجرانين.. لعبتكم دي فاهمينها.. ثورتنا مكملينها.. يسقط يسقط حكم العسكر

أمن الدولة كلاب الدولة.. دولا عتاولة في نهب الدولة.. وآدي رجال المال والعسكر.. دايرين نهب وسرقة وقهر.. مهما سجونكم تحبس صوتنا.. بكرة الثورة تحرر مصر.

إحنا نزلنا يوم 30.. لاجل نكمل في ثورتنا.. ولأجل ننال حريتنا.. مش علشان تحبسنا بيادة.. والتلفيق يرجع كالعادة.. وزي ما قولناها للإخوان.. حنقولها لكم انتوا كمان.. يسقط كل من خان.. عسكر.. فلول.. إخوان.. ولا خوف ولا رعب.. يسقط كل ولاد الكلب.. كل السلطة في إيد الشعب.

صوت الثورة لسه حي.. جاي بالنور جاي بالضي.. صوت الثورة طالع طالع.. م الزنازين و م الشوارع.. م الغيطان و م المصانع: العدالة الاجتماعية.. والكرامة والحرية.. عايزين ثورة عمالية.

ثورة ثورة حتى النصر.. ثورة تقيم العدل ف مصر.. علّي ف سور السجن وعلّي.. بكرة الثورة تشيل ماتخلي.. وبإدينا نخلق دنيا جديدة.. دنيا الناس فيها سعيدة.. دنيا الشارع فيها براح.. فيها الناس قبل الأرباح.. فيها المصنع للعمال.. مش لعصابة راس المال.. فيها الأرض للفلاح.. والتعليم حق ومجاني.. والعلاج والشغل متاح.. والدولة تبني المساكن.. والعدل يسود المحاكم.

قالوا حرية وقالوا قانون.. وحطوا رفاقنا في السجون.. احبس واحد يهتف مية.. مش هتنسونا القضية.. آدى الحالة الاقتصادية.. نكبة شديدة وخيبة قوية.. إصحى ياعامل مصر يامجدع.. واعرف دورك ف الوردية.. مهما بتشقى ومهما بتتعب.. تعبك رايح  للحرامية.. وعشان يكبر رأس المال.. نازلين دبح فى العمال.. فصل العامل بقى مشروع.. والإضراب أصبح ممنوع.. الإضراب هو سلاحنا.. ضد السلطة ال بتدبحنا.. الإضراب مشروع مشروع.. ضد الفقر وضد الجوع.

آه يا مصر وآه يا مصر.. لسه فيكي كلاب وقصر.. لسه فيكي اضهطاد.. في السياسة والاقتصاد

سيبوا الورد يفتح سيبوا.. هيثم مننا ومش هنسيبه

إوعي يا مصري تخون أفكارك.. حبس الثوار عاري وعارك

يا سيادة النائب العام.. الفلول خرجوا بكم؟

قالك ثورة يا ثوار.. ضد الذل وضد العار..  راح مغلي في الأسعار.. وجوع فينا ليل ونهار

إوعي يا مصري تخون أفكارك.. يسقط سيسي ومرسي مبارك