من هتافات الثوار في 30 يونيو المقبل

قولوا للحاكم جوه القصر.. انتوا عصابة بتسرق مصر
تقطع ميه.. تقطع نور.. تبنى السجن.. تعلي السور.. يوم 30.. هتغور.. هتغور
لما يبقى الدم رخيص.. يسقط يسقط أي رئيس
دم الشهداء غالي غالي.. دم الشهداء المجد العالي
دم ولادنا للحرية.. مش لعصابة إخوانجية
جابر جيكا ياولد.. دمك بيحرر بلد
وحياة دمك ياشهيد.. ثورة تاني من جديد
وأشهد يامحمد محمود.. كانوا خرفان.. وكنا أسود
ثورة ثورة ف كل مكان.. ضد المرشد والإخوان
ثورة ثورة حتى النصر.. ثورة في كل شوارع مصر
ثورة ثورة في كل حتة.. ثورة ثورة في 30 ستة
والعصيان المدني العام.. هوه طريقنا للأمام
وإن قتلونا في الشوارع.. كل الشعب المصري طالع
وان ضربونا بالرصاص.. إتعلمنا اللأه خلاص
أقفل ع الحرية الباب.. مرشد عار ورئيس كداب
أقفل ع الحرية النور.. مرشد عار ورئيس طرطور
اعتصام.. اعتصام.. حتى يسقط النظام..
مسرحية.. مسرحية.. والعصابة هي هي.. بس بدقن وجلابية
والعدالة الاجتماعية.. هي فين يا بلديا؟!
لسه السرقة زى ماهي.. لسه الرشوة زي ما هي..
والبطالة زى ما هي.. والفساد مية لمية
العدالة الاجتماعية.. هي طريقنا للحرية
حق العامل والفلاح.. هو طريقنا للكفاح
خيرت شاطر ده مش داري.. بهم الفقراء في الحواري
شربوا الفقرا المر سنين.. يا ما ليالي باتوا جعانين
شربوا المر وشربوا القهر.. وبيستلفوا طول الشهر
خلوا الفقرا تشوف النور.. زودولهم الأجور
خيرت شاطر خيرت بيه.. كيلو اللحمة بـ 100 جنيه.. وبكرة العيش بالكارنيه
احلق دقنك بين عارك.. تلقى وشك وش مبارك
افرح افرح يامبارك.. مرسي بيكمل مشوارك
يا مبارك نام واتهنى.. انت وراك أحفاد البنا
لا انتخابات ولا دستور.. لم جماعتك ياللا وغور.. خللي بلدنا تشوف النور
ارحل يعني امشي.. ياللى ما بتفهمشي
خيرت شاطر حلق حوش.. مشروع نهضة طلع فنكوش
مشروع نهضة خيبة قوية.. مشروع نهضة إخوانجية
يا عريان اتلم اتلم.. لجل الكرسي نسيت الدم
ياعريان يا عرة.. الثورة مستمرة
ياعريان يا ويكا.. يا عميل أمريكا
ياللى بتلعب بالبوليتيكا.. مرسي بيعشق ماما أمريكا
راح هنقولها جيل ورا جيل.. مرسي صديق إسرائيل
يا أمريكا لمي فلوسك.. بكرة الشعب المصرى يدوسك
ده تكفيري ودوه جهادي.. ضاعت سينا.. آه يا بلادي
المعونة الأمريكية.. دى سياسة استعمارية.. رافعة راية الصهيونية
والسفيرة الأمريكية.. دى سفيرة استعمارية.. رافعة راية إخوانية
كدابين.. كدابين.. ال يتاجروا بأسم الدين.. لا إخوان ولا مسلمين..
والبلتاجي والعريان.. عاملين زعماء ع الخرفان.. وبيتاجروا بالأديان
يسقط تجار الأديان.. يسقط أعداء الإنسان
اكتب علي جدران البيت.. مرسي رئيس بإزازه زيت
يا ابن بلدنا يا شارب المر.. إسمع صوت الثورة الحر
الشعب اتهان الشعب إتذل.. بقت العيشة خل في خل
قالوا حرية وقالوا عدالة.. شفنا خيانة وشفنا ندالة
شوفوا حزبهم السياسي.. ضد أهلي وبلدي وناسي
خيرت شاطر ملياردير.. قال ويقولك فاعل خير
دور يا كلام على كيفك دور.. والكتاتنى هوه سرور
وال يقولك طز في مصر.. وال بيفتي جوه القصر
وال يقولك صاحبي بيريز.. والصهيوني يبقى عزيز
نام وارتاح يا مبارك.. مرسي بيكمل مشوارك
أمن الدولة والعريان.. والنظام هو النظام
قامت ثورة من سنتين.. ركبوا عليها باسم الدين
جابوا رئيس بالانتخابات.. قالوا هيجيب حق ال مات
قالوا هيعيد المحاكمات.. ادوا براءة للضباط
يا إخوان صباح الخير.. خيرت شاطر ملياردير
باسم الشرع وباسم الدين.. سرقوا حقوق الفلاحين
وعشان يكبر رأس المال.. نازلين دبح فى العمال
وآدى سياستهم ع المكشوف.. جوع وبطالة وزرع الخوف
مش عايزين قروض دولية.. ولا من قطر والسعودية
وآدى الحالة لاقتصادية.. مشروع نهضة خيبة قوية
مشروع نهضة بيخدم مين.. يخدم باشا بكرش سمين
مش عمالنا الشقيانين.. ولا اهالينا المنهوبين
آدي بطالة وآدى تجويع.. وآدي بلاد معروضة للبيع
فصل العامل بقى مشروع.. والإضراب بقى ممنوع
وآدي الصورة واضحة صريحة.. نص العمال بقوا سريحة
وآدي الصورة واضحة صريحة.. الإخوان بقوا شبّيحة
الحرية بأيد الناس.. مش بالحاكم والحراس
واحنا شعارنا لاشتراكية.. والعدالة الاجتماعية
صوت الثورة طالع طالع.. م الشوارع والمصانع
صوت الثورة جاي جاي ..جايب النور جايب الضي
اسمع صوت المكن الداير.. اسمع صوت الشعب الثاير.. لساها ثورة يناير