بوابة الاشتراكي

إعلام من أجل الثورة

بيان طلاب حركة حقي بجامعة القاهرة

النهارده الانتساب.. بكره الدور على الانتظام

حسب قرار رئيس الجامعة، طلاب الانتساب بيحضروا بعض محاضراتهم يوم الجمعة بس، أما طلاب التعليم المفتوح؛ فزادت محاضراتهم وبقت 3 أيام في الأسبوع.

السبب اللي بيتحجج بيه رئيس جامعتنا هو مكافحة أنفلوانزا الخنازير … طـَب لو كان ده صحيح، ليه مافيش وحدات علاجية مجهزة ولا عربيات إسعاف؟؟؟ باستثناء العربية بتاعت التبرع بالدم اللي مش عارفين بيرو ح لمين!! ده حتى مافيش صابون ولا مواد مطهرة في الحمامات!

الظاهر إن مش هو ده السبب، وان السبب الحقيقي إنهم عايزين يلغوا نظام الانتساب خالص (حسب “خطة تطوير التعليم العالي” اللي بتقول صراحة ان نظام الانتساب هايتلغي بحلول عام 2010).

اللي بيعملوه في طلبة الانتساب ده ببساطة علشان يفتحوا الطريق أمام التعليم المفتوح والخاص، وبدال ما بندفع 500 جنيه مصروفات غير قانونية في انتساب، هايدفعونا 2000 وأكتر في التعليم المفتوح، أو 15 ألف في الجامعة الخاصة.

كلنا من حقنا تعليم مجاني، ومن حقنا نحضر محاضراتنا كاملة في كل أيام الأسبوع، ومافيش مادة في القانون تمنع طلاب الانتساب من حضور المحاضرات.

لازم كلنا نقف ضد قرار رئيس الجامعة، لأنه مش بس ضد طلاب الانتساب، ده كمان ضد مجانية التعليم، وماحدش مستفيد منه إلا رجال الأعمال اللي بيتاجروا بالتعليم في الجامعات الخاصة، ورجال الأعمال اللي مسئولين عن التعليم المفتوح.

وماتنسوش إننا لما وقفنا السنة اللي فاتت كلنا إيد واحدة، أجبرنا إدارة الجامعة على توفير الدعم على كل كتب كلية التجارة اللي بقى الكتاب فيها تمنه 5 جنيه.

طلاب حركة حقي