مهام رابطة أهالي عين شمس الثورية

دلوقتي وبعد ما أثبتنا لنظام اﻹخوان من خلال “تمرد” إننا قادرين نوحد صفوفنا ونقف في وش محمد مرسي قائد الثورة المضادة زى ما وقفنا ضد حسني مبارك والمجلس العسكري، محتاجين إننا ننظم نفسنا ونوحد صفوفنا ونقود إحنا معركتنا الجاية ونقف ضد أى مستغل سواء إخوان أو فلول أو عسكر، ﻷنهم بعيدوا إنتاج نفس النظام.

وعشان كدة قررنا إننا نأسس “رابطة أهالي عين شمس الثورية “، الرابطة دي هتكون ناس مننا، أهالي عين شمس وبتمثلنا بجد مش زي مجلس الشعب المزيف بتاع الحكومة، ونقدر من خلالها إننا نرصد مشاكل الحى ونضغط علي أى حكومة جاية سواء إخوان أو غيرهم إنهم ينفذوا مطالبنا، ونقدر نطلع بحلول بديلة بعيد عن استغلال الحكومة اللي بندفعلها فلوس ومش بناخد مقابلها خدمات للحي.

أهداف الرابطة في الفترة القادمة:
– هنجمع أكبر عدد يمثلنا من كل شارع في عين شمس وهنظم إجتماع أسبوعي للرابطة للبدء في رصد مشاكلنا والتفكير في حلول بديلة.
– تنظيم المسيرات والمظاهرات المتجهة من الحى من يوم 30/6 وما بعد، للمطالبة بإسقاط محمد مرسي وتشكيل حكومة كفاءات.
– حفظ الأمن في الحي من أى تعدي علي المواطنين من سرقات وجرائم عن طريق عمل لجان شعبية زي أيام الثورة.
– التصدي للتجار وسائقي الميكروبصات إذا استغلوا الموقف ورفعوا أسعار السلع على الأهالي بدون وجه حق.
– الرقابة على أفران العيش والتأكد من عدم تهريب الدقيق.
– توصيل صوت ورأي أهالي الحي للمجموعات الثورية في الأحياء المجاورة لكي نتشاور على ما هو أصلح لنا ونعمل بشكل موحد لهزيمة اعداء الثورة والمستغلين.

المجد للشهداء والنصر للثورة
رابطة أهالي عين شمس الثورية