بوابة الاشتراكي

إعلام من أجل الثورة

بيان الاشتراكيين الثوريين بدمياط

غلو العيشة.. غلو الخامة.. مش لاقيين غير وقف الحالة

يعنى إيه سعر الخامة يزيد وجودتها تقل؟! والأسعار ولعت، وكل يوم بتزيد، والشغل واقف، ولسه التاجر بيستلم الشغل بنفس السعر وكمان بيخصم منك؟!
ولو طلبت زياده من التاجر هيكون الرد: “كويس إنك شغال والناس مش لاقيه شغل”
يعنى إيه فتح السوق لإستيراد الموبيليا من الصين وتركيا؟!
يعنى إيه تيجي تشتغل الكهرباء تقطع بالساعات؟! طب فين محطة تقوية الكهرباء ال أُنشِئت من 6 شهور في دمياط؟!
يعنى إيه تشتغل 12 ساعة بدون تأمين صحي ولا معاش ولا تأمين ضد مخاطر وإصابات العمل ؟! ولو تعبت وقعدت يوم فالموضوع هيتحول لمشكله كبيرة لأن فيه إلتزامات هتتأخر عليك.

مطالب الحرفين واضحة وتتمثل في:
1- توفير الدعم لأصحاب الصناعات الصغيرة بشتى الطرق، وتفعيل المادة 17الخاصة بذلك في الدستور، والتي تنص على: “الصناعة مقوم أساسى لاقتصاد الوطني، وتحمى الدولة الصناعات الإستراتيجية، وتدعم التطور الصناعي، وتضمن توطين التقنيات الحديثة وتطبيقاتها وترعى الدولة الصناعات الحرفية والصغيرة”.
2- تفعيل الرقابة على أسعار المواد الخام وتفعيل الرقابة على الغرفة التجارية.
3- وقف احتكار استيراد الأخشاب والمواد الخام.
4- تشجيع المنتج المحلي ووقف استيراد المنتجات الصينية والتركية.
5- فتح باب التصدير لصغار الحرفيين وتوفير الدعم لهم مثل كبار الحيتان بالغرفة التجارية.

معدناش عارفين نعيش بجد.. لازم وقفة.. معدش ينفع نسكت أكثر من كده..
هناخد حقوقنا باتحادنا ضد اللي اغتصبوها

كل السلطة والثروة للعمال
حركة الاشتراكيين الثوريين – دمياط
8 أبريل 2013