بوابة الاشتراكي

إعلام من أجل الثورة

بيان جبهة طريق الثورة بالجامعة البريطانية في مصر

اسقط القانون وخرجهم من السجون

المعتقلين السياسيين أو الغير سياسيين اللي مقبوض عليهم عشوائي بيزيدوا كل يوم عن اليوم اللي قبله، تعذيب بالضرب وبالكهربا بيتم في السجون للمعتقلين وبقوا بيتضربوا جوه أقفاص المحاكم قدام القضاة عادي جداً، محاكم هزلية وقضاه بيجي لهم الحكم بالتلفونات، مسرحية اسمها انتخابات رئاسية داخلين عليها وكل يوم بلطجة الداخلية بتزيد على الكل بشكل مفزع ومخيف.

وعشان كده مجموعة من الثوار والحركات والأحزاب منهم “جبهة طريق الثورة (ثوار) – الإشتراكيين الثوريين – 6 إبريل – حزب مصر القوية – والتيار المصري” طرحوا مبادرة ثورية لإسقاط القانون التظاهر اللي اعتقل واتلفق بسببه قضايا لآلاف الشباب، وكمان للإفراج عن المعتقلين السياسيين.

الحملة بدأت بمؤتمر صحفى على سلالم نقابة الصحفيين يوم الخميس اللي فات وتحركنا بمسيرة في وسط البلد بعدها.

وده جدول الفعليات المتبقية:
– يوم الأربعاء (16 أبريل) سلاسل بشرية على كوبري إكتوبر الساعة 6 مساءا
– بعد ما الأجازة تخلص أمهات المعتقلين وزوجاتهم والمتضمانات معهن هيعتصموا أمام قصر الاتحادية يوم (22 أبريل) للإفراج عن المعتقلين وإسقاط قانون التظاهر.

كل الفعاليات دي بتمهد لمسيرة كبيرة ستتوجه لقصر الإتحادية يوم السبت (26 أبريل) لإسقاط قانون التظاهر والإفراج عن المعتقلين.

واحنا كجبهة طريق الثورة “ثوار” داخل الجامعة بندعوكم تشاركوا في السلاسل البشرية النهارده على كوبري أكتوبر الساعة 6، وبندعوكم لزيارة معرضنا يوم الخميس داخل الجامعة عشان هنعرض الإنتهاكات اللي بنتعرض لها في ظل النظام الحالي.

ليه لازم تشارك في إسقاط قانون التظاهر؟ لأن أي حد دلوقتي بيتقبض عليه من أي مكان، وممكن في يوم تكون إنت في الموقف ده، لازم نتحرك قبل ما الدور يجي علينا. وعشان تعرفوا إن الموضوع مش بعيد عن حد، أحمد أسامة زميلكم في إعدادي هندسة إتحكم عليه امبارح ب 5 سنين سجن ظلم، لو متكلمتش ممكن تكون اللي بعده، الظلم هيطول الكل لو فضلنا ساكتين.

جبهة طريق الثورة “ثوار” بالجامعة البريطانية في مصر
16 أبريل 2014