إلى عمال مصر وكادحيها: انزلوا يوم 25 أبريل

يا عمال مصر.. الحكاية مش حدوتة جزيرتين (تيران وصنافير) تنازل عنهم النظام للسعودية مقابل شوية معونات وفقط.

الحكاية أكبر من كده.. الحكاية حكاية أهالينا اللي ماتوا دفاعا عن الجزيرتين.. وهما بيقاوموا العدوان الصهيوني عام 1967، واليوم بيتم بيع دمهم عشان خاطر الحاكم يفضل على كرسي الحكم، كما أن التفريط في الأرض يعتبر تفريط في حق من حقوق أولادنا و أحفادنا و أحفاد أولادنا في أرضهم وثروتهم.

والحقيقة كمان أن التفريط مقابل شوية فلوس هو جزء من سياسة الخصخصة وبيع المصانع والارض للمستثمرين، وإصدار قوانين مجحفة بحقوق العمال والهجوم على الحرية النقابية وطرد العمال وغلاء الأسعار، وكل القرف اللي احنا عايشينه.

وكمان التنازل بيوضح أن النظام بيترمي أكتر وأكتر في حضن الصهاينة وأمريكا والسعودية، أصحاب المصلحة في السيطرة على خليج العقبة، وكلهم أعداء للشعب المصري ووقفوا ضد ثورته زي ما تآمروا على فلسطين من قبل.

ولأن البيع يعني كمان أن النظام مصمم على أننا مش موجودين مجرد جنود في المعسكر، فلم يأخذ برأينا طول فترة التفاوض السري مع السعودية.. يعني احنا ملناش لازمة، وإرادتنا ورأينا في سلة الزبالة زي ما بيعمل مع القانون كده بالضبط، وكلنا شايفين ازاي الحكومة مصممة على تنفيذ قانون الخدمة المدنية رغم رفضه من البرلمان.

وعشان كله ده.. تدعو حملة نحو قانون عادل للعمل، عمال مصر للنزول في 25 أبريل. وتناشد النقابات العمالية المكافحة الانضمام الى الدعوة للتظاهر وإصدار البيانات المؤيدة لمطالب شعب مصر، وإعلان الاحتجاج في الميادين ومواقع العمل ضد التنازل عن الجزيرتين ومن أجل الإفراج عن زمايلنا وأبنائنا اللي اتقبض عليهم داخل الجامعات ومن الشوارع والمقاهي والبيوت عشان رفعوا صوتهم وقالوا: لا لبيع مصر.

حملة نحو قانون عادل للعمل
23 أبريل 2016